Na ndajnë dhe më pak se 24 orë nga ndeshja e shumëpritur e kampionatit shqiptar, luhet derbi i kryeqytetit, Tirana-Partizani. Në konferencën për shtyp para ndeshjes, Ze Maria, trajneri brazilian i bardhbluve është shprehur se duhet ta fitojnë këtë ndeshje dhe të shkruajnë historinë.
“Gjendja e skuadrës është e mirë. Pas ndeshjes me Skënderbeun luajtëm edhe në Kupë, ku fituam. Për ju dhe të gjithë shqiptarët kjo është ndeshja më e rëndësishme e vitit, por për ne është një sfidë ku do të duhet të marrim 3 pikët. Është një ndeshje e rëndësishme, ne duhet të luajmë si në ndeshjet e fundit për të marrë 3 pikët, që është edhe objektivi ynë”, tha Ze Maria.
“Duhet të shkruajmë emrin në historinë e këtij klubi. Është shumë e rëndësishme dhe futbollistët e dinë këtë. Sa herë vij këtu, shoh fotot dhe javën e kaluar folëm me presidentin për Tiranën e madhe të viteve ’70. Kam folur me futbollistët, duam të bëjmë një pjesë të historisë dhe mundësinë e kemi”, tha Ze Maria.
Ndeshja mes Tiranës dhe Partizanit do të luhet të premten në orën 19:45, në “Selman Stërmasi”, dhe për herë të parë në këtë sezon ky stadium do të jetë i mbushur plotësisht, pasi biletat e parashikuara për këtë përballje, rreth 7.000 të tilla sa ç’është edhe kapaciteti maksimal i stadiumit, janë të shitura.
