Pas një rrugëtimi të gjatë, i cili ka kaluar nëpër të gjitha gjimnazet e Tiranës, u zhvillua dje në mbrëmje edicioni i dytë i “Tirana Arta Fest”.
E kthyer tashmë në një traditë për promovimin e talenteve të reja, në fusha të ndryshme të artit dhe kulturës, në gjimnazet e kryeqytetit, “Tirana Art Fest” shpalli fituesit në të gjitha zhanret dhe disiplinat si: këngë, kërcim, aktrim dhe kostumografi.
Çmimi i parë në këngë shkoi për Rea Nuhun, artistja e re më e mirë u shpall Bertila Bruka, ndërsa grupi më i mirë në këngë u shpall ai i gjimnazit “Qemal Stafa”.
Grupi më i mirë në kërcim u shpall ai i gjimnazit “Ismail Qemali” dhe në Hip-Hop, gjimnazi “Partizani”.
Një risi për këtë edicion ishte edhe pjesëmarrja e shkollave dhe gjimnazeve të zonave rurale, ku për herë të parë grupi më i mirë Folk u shpall ai i shkollës “Ibrahim Hasmema”, Petrelë, ndërsa grupi më i mirë i djemve, ai i shkollës “Sadik Stavileci”, Kashar.
Kryebashkiaku i Tiranës falënderoi, në mënyrë të veçantë, të gjithë nxënësit e shkollave dhe gjimnazeve të ish-komunave, të cilët iu bashkuan për herë të parë kësaj nisme.
