Që nga momenti që në grupin Ligës së Kombeve na ra të përballemi me Izraelin, një pjesë e tifozëve nuk treguan interes që të shkonin në stadium. Është e freskët ajo që ndodhi në vitin 2016-të, ku policia bëri terror mbi tifozët në prag të ndeshjes me të njëjtin kundërshtar.
Rreth 200 persona janë shoqëruar për verifikim në komisariat nga uniformat blu, ndërsa gjithkush duhet të kalojë “nëpër vrimën e gjilpërës”. Një situatë lufte, e denjë për gjendje të jashtëzakonshme. Nisur nga kjo gjë, tifo-grupi i njohur i kombëtares nga Prishtina, “Plisat”, ka njoftuar bojkotim të ndeshjes së sotme të kuqezinjve.
Sipas tifozëve nga kryeqyteti i Kosovës, shkak për këtë vendim janë bërë masat ekstreme të sigurisë. “Plisat në ketë ndeshje nuk marrin pjesë të organizuar (normalisht që Plisa do të ketë nëpër tribuna). Arsyeja është që ketë ndeshje nuk e organizon Federata Shqiptare e Futbollit, por komplet Ministria e Brendshme.
Ta caktojnë tri orë para ndeshjes me hy në stadium, nuk të sigurojnë kurrgjë as me hangër dhe as me pi, plus edhe dy orë ndeshja e bëhen 5 orë me nejt në stadium. I kanë dhanë aq rëndësi këtij shteti (Izraelit) e në fakt kurrkujt nuk i kërcet me i bo send. Kështu që na i urojmë fitore Shqipërisë e sa ma shumë probleme Ministrisë,” – shkruan Albert Kastrati në faqen e vet në Facebook, i cili njihet si lideri i këtij tifo-grupi shqiptar.
