Drejtuesi i Departamentit Juridik në PAA, Thoma Miço ka folur për mediat pas pranimit të kërkesës për tërheqjen e ankimimit lidhur me listat zgjedhore.
Ashtu si kreu i PAA-së, Miço tha se ankimimi nuk kishte më vlerë për sa kohë është shtyrë data e zgjedhjeve, ndërsa datat më të mundshme për zhvillimin e zgjedhjeve parlamentare, ai tha se janë 16 dhe 23 korrik:
“Pas arritjes së marrëveshjes mes mazhorancës dhe opozitës dhe meqë 18 qershori nuk do jetë data e mundshme për zgjedhjet parlamentare, nuk përbënte esencë që ne të vazhdonim ankimin në Kolegjin Zgjedhor prandaj bëmë kërkesën për tërheqjen e saj.
Datat e mundshme për zgjedhjet parlamentare janë datat brenda korrikut, 16 ose 23 korrik për PAA-në, në kërkesat tona këto dy data janë të mundshme.”
Gjithashtu, Miço shprehu disi edhe pakënaqësinë e tij lidhur me mosprezencën e PAA-së në marrëveshjen e mbrëmshme mes Ramës dhe Bashës, teksa tha se Partia Agrare Ambientaliste do hynte në zgjedhje edhe pa PD-në nëse fajet për mos arritjen e një marrëveshjeje do i kishte Partia Demokratike.
“Pishman PAA nuk do bëhet, bëhet vetëm atëherë kur fajin për mosarritjen e marrëveshjes do ishte PD. Nëse do ishte shkaku PD-ja, ne do hynim edhe vetëm në zgjedhje.”
