Real Madrid nuk gjen qetësi në dhomat e zhveshjes. Pas Isco, Modric dhe Marcelo që kërkojnë të largohen nga ‘Bernabeu’, tashmë një tjetër emër i madh nuk duket i bindur për të qëndruar. Kapiteni i Merengues, Sergio Ramos, ka problem me të gjithë: që nga drejtuesit e stafi teknik, e deri tek disa shokë të ekipit.
Është emisioni ‘El Chiringuito’ që ka publikuar lajmin dhe në rast se konfirmohet, atëherë Florentino Perez do të përballet me një situatë mjaft të rëndë. Çështja Sergio Ramos rrezikon të minojë më keq një sezon të komplikuar. Kapiteni i Los Blancos ka problem me të gjithë tek Real dhe kjo nuk është gjë e vogël.
Një pjesë e mirë e lojtarëve ka humbur respektin për Ramos, pas toneve të ashpra me të riun Reguilon në stërvitje, por mbi të gjitha raporti është shkatërruar me Isco, aq sat ë dy nuk flasin më. Përveç kësaj diskutohet edhe rinovimi i kontratës, që mund të çojë në thyerje të marrëdhënieve: në skadencë në 2020 e një pagesë që kalon 10 milionë në sezon, për të rinovuar deri në 2021 Ramos kërkon 18 milion në vit. Florentino Perez e ortakët nuk janë të bindur. Në moshën 32 vjeçare, qendërmbrojtësi mund të përfundojë në merkato.
