Elseid Hysaj dhe Napoli duket se janë shumë larg një rinovimi të mundshëm dhe e ardhmja e mbrojtësit shqiptar parashikohet larg Italisë. E përditshmja britanike “The Sun” i ka kushtuar një artikull Hysajt sot dhe raporton se Chelsea është duke punuar për të sjellë në Londër mbrojtësin shqiptar.
Prej tre sezonesh 24-vjeçari shkodran është pjesë e Napolit dhe nën urdhrat e Sarrit ka pësuar një rritje të madhe. Trajneri italian e ka stërvitur Hysajn edhe tek Empoli, e tani dëshiron që ta ketë sërish nën urdhra në Premier League, pasi e sheh si një garanci në prapavijë.
Por pas largimit të Sarrit nga Napoli dhe ardhjes së Ancelottit, Hysaj ka humbur vendin e titullarit dhe nuk është duke kaluar një periudhë aspak të mirë, duket se shkodrani nuk përshtatet me skemat e trajnerit të ri.
Ai ka qëndruar disa ndeshje në stol dhe në Champions League ka luajtur shumë pak, por sipas menaxherit të lojtarit kjo ka ardhur për shkak të rotacioneve që po bëhen në ekip dhe nuk ka të bëjë me formën sportive të lojtarit.
Kontrata e Hysajt me Napolin është e vlefshme deri në vitin 2021, ndërsa klauzola për prishjen e saj është përcaktuar 50 milionë euro. Gjithsesi londinezët janë të bindur se mund ta marrin edhe më lirë, nëse e blejnë mbrojtësin që në janar, por e lënë në huazim te Napoli, deri në fund të këtij sezoni.
