Presidenti i Kosovës, Hashim Thaçi kërkon që misionet ndërkombëtare të largohen nga vendi. Deklarata e Thaçit u bë në fjalimin që mbajti para Forcave të Sigurisë së Kosovë. Gjithashtu, Presidenti është ankuar për procesin e anëtarësimit të Kosovës në Bashkimin Evropian, shkruan dailymail.co.uk.
Thaçi tha se “ka kaluar koha e misioneve ndërkombëtare në Kosovë”. Duke u ankuar për “numrin e pajustifikuar” të ndërkombëtarëve që operojnë në Kosovë, Presidenti deklaroi se “tani përgjegjësia e rrugës që do të marrim për të tashmen dhe të ardhmen është në duart tona”.
NATO zhvilloi një fushatë ajrore 78 ditore ndaj bazave ushtarake serbe, për të ndaluar me çdo kusht spastrimin etnik që po bënin serbët ndaj shqiptarëve. Lufta e Kosovës përfundoi në qershor të vitit 1999 dhe drejtimi i saj u mor nga një mision i OKB-së. Ky mision ende vepron, por në një rol të vogël pas shpalljes së pavarësisë në 2008. Kosova njihet nga 114 vende, por jo nga Serbia. TIRANA TODAY
