Presidenti i Kosovës, Hashim Thaçi nuk i ndahet idesë së korrigjimit të kufijve të Kosovës. Ai ka qenë në Tiranë sot, ku është takuar me presidentin Meta, por edhe me kryeministrin Rama. Në një postim në Facebook, presidenti i Kosovës zbardh takimin me Ramën, teksa vë theksin tek nevoja e korrigjimit të padrejtësive historike.
“Në këtë takim ngritëm nevojën e korrigjimit të padrejtësive historike, duke bashkuar faktorin shqiptar rreth sensibilizimit të së drejtës të bashkëngjitjes së Preshevës, Medvegjës dhe Bujanocit me territorin e Republikës së Kosovës”, shkruan ndër të tjera Thaçi.
Kujtojmë se ideja për korrigjimin e kufijve ka futur ‘në sherr’ palën shqiptare, teksa kryeministri i Kosovës, Ramush Haradinaj ka kundërshtuar publikisht korrigjimin e kufijve.
Postimi i presidentit të Kosovës:
Sapo zhvillova një takim me kryeministrin e Republikës së Shqipërisë, Edi Rama, ku mes tjerash biseduam për domosdoshmërinë e hapjes së plotë të kufirit Kosovë-Shqipëri dhe krijimin e një hapësire shqiptare pa kufi, nën ombrellën euroatlantike. Në këtë takim ngritëm nevojën e korrigjimit të padrejtësive historike, duke bashkuar faktorin shqiptar rreth sensibilizimit të së drejtës të bashkëngjitjes së Preshevës, Medvegjës dhe Bujanocit me territorin e Republikës së Kosovës. HTH
