Më shumë se 450 persona humbën jetën dhe qindra të tjerë kanë mbetur të plagosur si pasojë e tërmetit të fuqishëm që goditi zonën kufitare mes Iranit dhe Irakut. Ndërkohë mijëra iranianë kanë kaluar natën e dytë në qiell të hapur teksa temperaturat janë thuajse zero, pas tërmetit me magnitudë 7.3 ballësh që tronditi vendin ditën e diel.
Qeveria vendase po përpiqet që të dërgojë ndihmë në zonat e goditura më shumë, në provincën Kermanshah, ku qindra shtëpi janë shkatërruar plotësisht. Presidenti Hassan Rouhani i cili ka vizituar rajonin, është shprehur se banesat e ndërtuara nga shteti kanë pësuar më shumë dëmtime e për këtë personat që janë marrë me ndërtimin e tyre do të mbajnë përgjegjësi.
“Kush është përgjegjësi për këtë gjë? Inxhinierët tanë?”, tha presidenti, i cili kërkoi nga autoritetet përkatëse që të gjenin përgjegjësit që nuk kanë përdorur standardet e ndërtimit.
Ndërkohë autoritetet irakiane bënë me dije se 9 persona humbën jetën dhe disa qendra të tjerë u plagosën për shkak të tërmetit që goditi zona me dendësi të ulët popullsie pranë kufirit. Shumë e ndryshme situata në Iran, ku me mijëra fjetën jashtë banesave të tyre pavarësisht të ftohtit.
Mediat lokale bëjnë me dije se banesat e shumë prej atyre që fjetën jashtë, ishin të paprekura nga tërmeti, por njerëzit kishin frikë të ktheheshin brenda prej lëkundjeve dytësore.
“Po qëndrojmë në një tendë dhe nuk kemi ushqime të mjaftueshme. Mund të dëgjosh fëmijë që qajnë pasi kanë të ftohtë. Po mbahen ngrohtë vetëm nga përqafimi i prindërve të tyre”, tha 42-vjeçari Ali Gulani për BBC. Ai jeton në qytetin e goditur rëndë nga tërmeti dhe shton se njerëzit po djegin arka për të qëndruar të ngrohtë.
Gulani shton se njerëzit në qytetin e tij ende nuk kanë marrë asnjë ndihmë. Madje sipas tij, shumë persona shkojnë në pjesën tjetër të qytetit për t’u furnizuar me ujë.
Rreth 70 000 njerëz kanë nevojë për ndihmë dhe strehë, ndërsa OKB bëri me dije se ishte e gatshme të ndihmonte nëse Irani e kërkon këtë.
Aktualisht, dhjetëra ekipe të Gjysmëhënës së kuqe po punojnë në zonën e goditur nga tërmeti, ku në pjesën më të madhe mungon uji dhe energjia elektrike, ndërsa raportohet se rrugët e bllokuara nga tërmeti po pengojnë ndjeshme këto përpjekje.
