Talebanët në Afganistan kanë bërë thirrje për mbështetje ndërkombëtare, pasi vendi po përballet me pasojat e një tërmeti shkatërrues me magnitudë 6.1 ballë. Më shumë se 1000 njerëz janë vrarë dhe të paktën 1500 janë plagosur.
Provinca juglindore Paktika është goditur më së shumti, dhe OKB-ja po përpiqet të sigurojë strehim emergjent dhe ndihmë ushqimore.
Përpjekjet e shpëtimit po pengohen nga reshjet e dendura të shiut dhe mungesa e burimeve. Të mbijetuarit dhe shpëtuesit i kanë thënë BBC-së për fshatrat e shkatërruar plotësisht pranë epiqendrës së tërmetit, për rrugët e rrënuara dhe kullat e telefonave celularë – dhe për frikën e tyre se numri i të vdekurve do të rritet më tej.
Tërmeti më vdekjeprurës që goditi vendin në dy dekada është një sfidë e madhe për talebanët, lëvizjen islamike e cila rifitoi pushtetin vitin e kaluar pas rënies së qeverisë së mbështetur nga perëndimi.
Tërmeti goditi rreth 44 km (27 milje) nga qyteti i Khost, dhe lëkundjet u ndjenë deri në Pakistan dhe Indi.
Afganistani është në mes të një krize humanitare dhe ekonomike, dhe Abdul Qahar Balkhi, një zyrtar i lartë i talebanëve, tha se qeveria ishte “e paaftë financiarisht të ndihmojë njerëzit në masën që është e nevojshme”.
Agjencitë e ndihmës, vendet fqinje dhe fuqitë botërore po ndihmonin, tha ai, por shtoi: “Ndihma duhet të rritet në një masë shumë të madhe, sepse ky është një tërmet shkatërrues që nuk është përjetuar në dekada”.
Kreu i Kombeve të Bashkuara, António Guterres tha se agjencia ishte “mobilizuar plotësisht” për katastrofën. Ekipet shëndetësore, furnizimet mjekësore, ushqimi dhe strehimoret e urgjencës ishin rrugës për në zonën e tërmetit, thanë zyrtarët e OKB-së.
Shumica e viktimave deri më tani kanë qenë në rrethet Gayan dhe Barmal të Paktikas. Një fshat i tërë në Gayan thuhet se është shkatërruar. “Ishte një gjëmim, dhe shtrati im filloi të dridhej”, tha një i mbijetuar, Shabir, për BBC.
Komunikimi pas tërmetit është i vështirë, për shkak të dëmtimit të kullave të telefonisë celulare dhe numri i të vdekurve mund të rritet edhe më tej, tha një gazetar lokal në zonë për BBC.
Burimi i lajmit: BBC. Përshtatur nga Tirana Today
