Edi Rama është takuar sot me banorë të Librazhdit, ku ka folur për koalicionin me qytetarët, si dhe ka komentuar “listën e zezë” të shumë përfolur.
Rama sqaroi se personat që janë në atë listë janë thjesht një përmbledhje e emrave të komentuar nga qytetarët, ndërsa theksoi se do merren në konsideratë vetëm ankesat me profile të vërteta dhe qëf kanë fakte.
““U bë nami për një listë që doli në Facebook-un tim. Lista është nga komentet e njerëzve, as për të nxjerrë të këqijtë, as për t’i dënuar, as për ndëshkime administrative, fare. Ajo është përmbledhje e emrave që janë përmendur nga njerëzit që kanë komentuar, aty janë njerëz realë, ka nga ata që fshihen pas profileve, por mekanizmi që do ndërtojmë nuk do jetë ky. Kush do ngrejë problem do jetë me identitetin e vet dhe me gjithçka të faktuar e që do të mbajë përgjegjësi për këtë”, tha Rama.
Gjithashtu, kryeministri foli edhe për krahasimet e shumta të qytetarëve dhe mediave lidhur me rikthimin e diktaturës, teksa tha:
“O ç’do bëjnë, kazani do thotë erdhi diktatura, u kthye Enver Hoxha, do i dëgjoni të gjitha, do jetë luftë e këtë luftë jemi gati ta bëjmë se për këtë e morëm mandatin”.
