Vjen reagimi i Rusisë pas vendimit të SHBA-së për t’u tërhequr nga Traktati i Forcave Bërthamore me Rreze të Mesme. Ministri i Jashtëm i Rusisë, Sergei Lavrov e cilësoi këtë vendim si të turpshëm, teksa hodhi poshtë aludimet për fillimet e një lufte të re të Ftohtë:
“Nuk mendoj se bëhet fjalë për një Luftë të re të Ftohtë. Por, një epokë e re ka nisur. Është karakteristikë e epokës së re, në të cilën SHBA-ja po thyen sistemin ndërkombëtar të kontrollit të armëve dhe sistemin që i frenon armët strategjike sulmuese. Është turp”, tha Lavrov gjatë një vizite në Bishkek.
Po ashtu, ministri rus tha se Rusia do të përdorë mjete ushtarake dhe teknike për t’iu përgjigjur kërcënimeve që paraqet tërheqja e SHBA-së nga traktati.
Tërheqja e SHBA-së nga traktati në fjalë u bë i ditur nga sekretari amerikan i Shtetit, Mike Pompeo, i cili tha se Rusia nuk ka respektuar kriteret e kësaj marrëveshjeje.
