Qeveria e Putin e cilësoi si të papranueshme kërkesën e Francës dhe Rusisë për të liruar 24 marinarët ukrainas që Rusia i ka burgosur prej më shumë se një muaji.
Kremlini sulmoi Merkelin dhe Macron pasi këta të fundit i kërkuan dje Rusisë që të lironin marinarët e Ukrainës të kapur së bashku me anijet e tyre në ngushticën Kerç, që lidh Detin e Zi me Detin Azov.
Ministria e Jashtme e Moskës hodhi poshtë në një deklaratë kërkesat e bëra nga Berlini dhe Parisi, duke i quajtur ato “të papranueshme”. Dhe një zëdhënës i Kremlinit shtoi se Putin kishte diskutuar privatisht çështjen me Merkel, duke marrë parasysh pozicionin e saj.
Megjithatë, zëdhënësi shtoi se presidenti rus do të veprojë në përputhje me ligjin e vendit të tij.
Detarët, të akuzuar për kalim të paligjshëm të kufirit rus, janë mbajtur nga Moska që nga 25 nëntori kur ndodhi incidenti ndërkombëtar.
Pas kapjes, qeveria ukrainase u bëri thirrje aleatëve të saj perëndimorë të marrin në konsideratë sanksionet e mëtejshme kundër Moskës. Rusia, nga ana tjetër, akuzoi Ukrainën për komplotimin me Perëndimin për të shkaktuar një krizë.
Dje Merkel dhe Macron thanë në një deklaratë të përbashkët: “Ne kërkojmë tranzit të sigurt, të lirë dhe të papenguar për të gjitha anijet përmes ngushticës Kerç dhe lirimin e menjëhershëm dhe të pakushtëzuar të të gjithë detarëve ukrainas të ndaluar ilegalisht. Ata gjithashtu duhet të jenë në gjendje të festojnë festat ardhshme me familjet e tyre.”
Të dy udhëheqësit e kanë dënuar edhe pushtimin e Krimesë nga Rusia në vitin 2014 dhe kanë refuzuar ta pranojnë atë.
“Situata e të drejtave të njeriut në Krime, e cila u aneksua nga Rusia në kundërshtim me të drejtën ndërkombëtare dhe përdorimi i forcës ushtarake nga Rusia në Ngushticën e Kerçit dhe kontrollet abuzive në Detin e Azov, janë gjithashtu një burim i madh shqetësimi për ne”, vijoi deklarata.
Kërkesat tashmë janë tallur nga parlamenti rus të premten, pak orë pas lëshimit të tyre.
Kryetari i Dhomës së Ulët të Rusisë, Vyacheslav Volodin, sulmoi qeverinë franceze dhe gjermane, duke thënë se së pari ato duhet të shqyrtojnë përdorimin e forcës brenda kufijve të tyre para se të flasin qeveritë e tjera.
Ai tha: “Ndryshe nga Franca dhe Gjermania, Rusia nuk përdor kurrë topa të ujit, gaz lotsjellës ose fishekë gome për të shpërndarë protestuesit. Më mirë duhet ta marrin këtë parasysh në radhë të parë. Ata duhet të kishin shprehur shqetësimin e tyre lidhur me situatën e të drejtave të njeriut në Krime para referendumit të vitit 2014 kur autoritetet ukrainase ndaluan mësimin e fëmijëve në gjuhën e tyre amtare.”/ Burimi Express.co, Përshtati TIRANA TODAY
