Kompania e telefonisë mobile “Telekom Albania” është shitur për 50 milion euro. Lajmi bëhet i ditur nga kompania greke OTE, pjesë e grupit Deutsche Telekom, e cila kontrollon kompaninë shqiptare Telekom Albania.
Mësohet se kompania do të kalojë në pronësi të kompanisë bullgare “Albania Telecom Invest AD”. Kjo e fundit drejtohet nga Spas Roussev, i cili zotëron shumicën e aksioneve të operatorit të telekomunikacionit Bullgar, Vivacom, dhe Elvin Guri, Investitor Shqiptaro – Bullgar.
“Shitja e Telekom Albania përmbyll investimin e suksesshëm të grupit OTE në Shqipëri. Është një vendim strategjik i Grupit OTE i cili po ridimensionon prioritetet dhe planet afatgjata të zhvillimit, në mënyrë që të krijojë vlerë të shtuar për aksionerët dhe të sigurojë zhvillim të qëndrueshëm”, tha Presidenti dhe njëherazi Drejtori Ekzekutiv i OTE, Michael Tsamaz.
Mësohet se kjo marrëveshje ka hyrë në fazën e saj finale për të vijuar me aprovimin administrativ të autoriteteve lokale dhe financiare, procedura përmbyllëse të cilat priten të përfundojnë në gjysmën e parë të vitit 2019.
