Zbulohen detaje të reja lidhur me ngjarjen e rëndë që ndodhi dje në një servis celularësh, ku u plagos punonjësi Gentian Hoxha.
Fillimisht, u dyshua se në dyqan atij i ishte vënë eksploziv, por rezultoi e kundërta. Dyshohet se 34-vjeçari ka qenë duke montuar një minë në një celular, kur ka ndodhur një incident, duke i shpërthyer mina në dorë.
Si pasojë, Hoxha u plagos në fytyrë dhe në duar, ku i janë këputur gishtat e dy duarve.
Në servisin e celularëve janë gjetur dy kapsolla ende të paplasura, pluhur tritoli, disa qarqe elektrike, tela elektrik përcjellës si dhe një mikroskop, i cili përdorej për montimin e minave.
Sipas policisë, mund të ketë patur edhe lëndë tjetër shpërthyese. Gentian Hoxha aktualisht ndodhet në spital, jashtë rrezikut për jetën, ndërsa është arrestuar edhe për armëmbajtje pa leje, teksa policët po e mbajnë nën vëzhgim.
Mendohet se Gentian Hoxha kishte marrë porosi për montimin e minave, për të cilat paguhej rreth 2 mijë euro.
Shpërthimi i fuqishëm ndodhi dje rreth orës 10:30, në rrugën “Qemal Guranjaku” pranë Drejtorisë së Higjienës, ngjarja që u raportua në kohë reale me pamjet ekskluzive nga Tirana Today.
