Në orët e para të mëngjesit të sotëm janë plagosur dy persona në Prishtinë. Këta të fundit janë jashtë rrezikut për jetën, ndërsa zëdhënësi i policisë, Daut Hoxha tha:
“Të dyshuar në këtë rast janë tre persona të cilët dyshohet se janë larguar nga vendi i ngjarjes me një veturë BMW me ngjyrë të zezë dhe gjatë largimit me veturën e lartcekur në lëvizje kanë bërë dëmtime edhe të tri veturave të tjera”.
Mësohet se një prej të plagosurve ka marrë lëndime nga arma e zjarrit në kraharor dhe në dorë. Ai është dërguar në QKUK dhe është jashtë rrezikut për jetë, ndërsa personi tjetër ka marrë gërvishtje të cilat dyshohet të jenë po ashtu nga arma e zjarrit.
Nuk dihet shkaku i këtij atentati, ndërsa teknikët e kriminalistikës kanë bërë ekzaminimin e vendit për zbardhjen e ngjarjes.
