Një 47-vjeçar nga Tirana është arrestuar në flagrancë të enjten pasi goditi me grusht trajnerin e Tirana U 17, Migen Memelli.
Sipas një njoftimi për shtyp të Piolicisë, Abdyl Çeku, rreth orës 09:50, tek fusha e sportit ” “Skënder Halili”, në Qytetin e Nxënësve, është konfliktuar duke e goditur me grusht, trajnerin Memelli për shkak se nuk e ka përfshirë në lojë djalin e tij. Çeku tashmë do të përballet në gjykatë me akuzën “kanosje për shkak të detyrës”.
Burimet policore bëjnë të ditur se Abdyl Çeku e kishte kërcënuar Memellin duke i thënë: “Të pres fytin”.
Memelli ka qenë vetë në polici ku ka dëshmuar për incidentin.
Kjo ngjarje ndodh pak kohë pasi një incident i ngjashëm kishte ndodhur në Shkodër, ku një person kishte tentuar të godite me thikë trajnerin e Vllaznisë Ernest Gjoka.
Memelli është një ish-futbollist i njohur, i cili në të kaluarën ka luajtur me ekipin e Tetutës për shumë vite.
