Në dy ndeshjet e para të Ligës së Kombeve, kombëtarja kuqezi e drejtuar nga Panucci ka marrë një fitore dhe një humbje. Humbja ndaj Skocisë u quajt një shfaqje e shëmtuar e skuadrës në fushë, pasi loja ishte shumë e dobët dhe e paorganizuar. Presidenti i Federatës së Futbollit, Armand Duka i doli në mbështetje trajnerit italian, duke thënë se nuk duhej bërë dramatike kjo humbje.
Duka ka folur sërish në një intervistë për “Tv Klan”, për situatën në kombëtare pas këtyre dy ndeshjeve dhe ka përforcuar idetë e tij se Panucci nuk është i rrezikuar. “Sulmi ndaj trajnerit, ndaj një njeriu të vetëm, më duket i orkestruar, i dirigjuar. Çdo skuadër ka limitet e veta, ka fatin e vet. Pra, do të arrijë një rezultat jo vetëm nga përgatitja dhe performanca e skuadrës, por edhe nga fati, kështu që Panucci duhet të vazhdojë. Kjo është loja, ky është futbolli, duhet të tentosh maksimalisht të përmirësohesh.
Vetëm në momentet që armatën që ke nuk mund ta përmirësosh, atëherë mund të bësh ndryshime. Të humbësh një ndeshje me Skocinë nuk do të thotë se duhet të presësh koka. Patjetër, ne duhet të bëjmë analiza, duhet të kuptojmë se ku i kemi defektet sportive dhe jo të kalojmë në emocione luftarake”, ka thënë Duka.
