Të ardhurat për frymë të shqiptarëve, në vitin 2016, ishin rreth 4200 dollarë për frymë, sipas statistikave të fundit të publikuara nga Fondi Monetar Ndërkombëtar (FMN). Me këtë nivel, Shqipëria renditet e 106-a në botë, nga 190 shtete, për të cilat raportohen të dhënat e prodhimit të brendshëm nominal (të parregulluar me inflacionin) për frymë.
Shqipëria, jo vetëm që është në njëqindëshen e dytë, por ajo klasifikohet më negativisht, në raport me shtetet e tjera të Europës, por edhe me rajonin dhe për më tepër nuk ka shënuar asnjë progres në dhjetë vitet e fundit.
Më mirë, nga rajoni, paraqitet Sllovenia, me 21 mijë dollarë për frymë (vendi 38), Kroacia me 12 mijë dollarë (vendi 61), Rumania me 9,500 dollarë (vendi 67), Bullgaria 7,400 dollarë (vendi 79), Mali i Zi rreth 6,600 dollarë (84), Serbia rreth 5,400 USD (vendi 92), Maqedonia rreth 5,700 USD (93) dhe Bosnjë dhe Hercegovina me 4,300 USD, në vitin 2015. Shqipëria vjen menjëherë pas Bosnjës (të dhënat për Kosovën mungojnë).
Shqipëria nuk rezulton të ketë bërë asnjë përparim në dekadën e fundit, teksa të njëjtat të dhëna të FMN-së, për vitin 2005, tregojnë se ne renditeshim edhe 11 vite më parë, po në pozicionin e 106, duke treguar se vendi ka ngecur në të ashtuquajturin proces të konvergjencës (rritjen me ritme më të shpejta se vendet e zhvilluara, në mënyrë që të kapim gradualisht mesataren e të ardhurave të BE-së). Ky proces, fillimisht, mendohej se do të kërkonte të paktën 30 vite, por teksa ne dukshëm kemi ngecur, do të duhet të presim shumë më tepër. Në vitin 2016, të ardhurat për frymë të Shqipërisë (4203 USD) ishin sa gjysma e mesatares së Europës Lindore (8836 USD) dhe 13% të atyre të Bashkimit Europian (32243 USD). /Monitor.al
