Në Institutin e Sigurimeve Shoqërore figurojnë mospërputhje të të kartës personale të identitetit me emrat e punëmarrësve.
Këtë problematikë e vuri në dukje Drejtoria e Përgjithshme e Tatimeve, e cila u bën apel bizneseve që të deklarojnë të dhënat e sakta të punëmarrësve, në mënyrë që të mos ketë pasoja për punonjësit.
“Bazuar në Ligjin Nr. 9136, datë 11.09.2003 “Për mbledhjen e kontributeve të detyrueshme të sigurimeve shoqërore dhe shëndetësore”, i ndryshuar, çdo punëdhënës, është përgjegjës për mbajtjen e kontributeve të punëmarrësit dhe deklarimin e pagesës në organet tatimore, së bashku me kontributet e punëdhënësit.
Sipas nenit 15 të këtij ligji, çdo tatimpagues deklarues (punëdhënës), është i detyruar që të vendosë në listë-pagesë numrin personal të çdo punonjësi të punësuar prej tij.
Kujtojmë çdo tatimpagues, që të jetë i saktë në deklarimin e këtyre të dhënave, pasi çdo gabim përveçse është penalizues për vetë ato, sjell pasoja edhe për punëmarrësit e tyre, për sa i takon përfitimeve që ato do të kenë, përkundrejt kontributeve të paguara realisht”, thuhet në njoftimin e Drejtorisë së Përgjithshme të Tatimeve.
