Plani operacional që parashikon shqyrtimin e ankesave të subjekte politike si dhe monitorimin e procesit zgjedhor është gati nga Task-Forca e ngritur pas marrëveshjes Rama-Basha.
Dje u zhvillua mbledhja e pestë e Task-Forcës, ku u diskutua plani i masave operacionale për mbarëvajtjen e procesit ditën e zgjedhjeve.
Anëtarëve të Task-Forcës ju ishte vënë në dispozicion paraprakisht plani në fjalë, i cili përfshin një sërë masash.
Plani për disa Ministri cakton masa të posaçme për t’u ndjekur ditën e zgjedhjeve, ndërsa ai u miratua pas diskutimeve dhe zbatimi i tij do të fillojë menjëherë.
Si pikë e dytë në funksion të transparencës u trajtua një ankesë e sjellë në adresë të Task-Forcës nga një subjekt politik dhe iu la detyrë Drejtori të Policisë për ndjekjen e mëtejshme të rastit dhe kryerjen e veprimeve të duhura procedurale.
Numri për denoncimet:
“Zyra e zëvendëskryeministres, njofton të gjitha subjektet elektorale se ka vendosur në dispozicion të tyre numrin 068 80 444 33, si pikë kontakti me kabinetin e zv/Kryeministrit, si kryetar i Task Forcës, me qëllim referimin e rasteve te përfshirjes se administratës dhe policisë shtetit ne veprimtari te paligjshme ne ditën e zgjedhjeve dhe gjatë procesit te numërimit”, thuhet në njoftimin e zv/kryeministres.
Gjithashtu, në dispozicion të publikut është vendosur edhe një portal elektronik për denoncime të shkeljeve gjatë procesit zgjedhor
Portali “Task Forca për zgjedhjet 2017” është i aksesueshëm në faqen zyrtare të Kryeministrisë me qëllim referimin e rasteve të përfshirjes së administratës së Kryeministrisë dhe institucioneve të varësisë, gjatë fushatës elektorale, ditën e zgjedhjeve si dhe gjatë procesit te numërimit.
