Tare mban premtimin, sulmuesi i Lazios tek Flamurtari

Flamurtari është ekipi që ka qenë më aktiv në merkation e janarit në kampionatin shqiptar, ku ka afruar lojtarë cilësorë. Por goditja që ka bërë në pak para se të mbyllet afati kalimtar është më e madhja që ka bërë ndonjëherë klubi. Bëhet fjalë për një supersulmues i cili ka dalë në akademinë e Barcelonës dhe në 2012-ën ka kaluar tek ekipi i moshave të Lazios. Bëhet fjalë për Mamadou Tounkara, senegalezin e lindur në Spanjë që ka një të kauar mjaft të rëndësishme.

22-vjeçari në vitin 2014 debutoi me ekipin e parë të Lazios, duke luajtur dy ndeshje dhe më pas u huazua tek Crotone dhe skuadra satelit e bardhekaltërve, Salernitana, ku sulmuesi ka patur mundësi të aktivizohet. Klubi kuqezi ka mbyllur detajet e transferimit të Tounkara, duke përforcuar edhe më tepër sulmin, i cili është shndërruar në repartin më të frikshëm të kampionatit.

Administratori i Flamurtarit gjatë periudhës që ishin në fazën përgatitore në Turqi ka takuar edhe Igli Taren dhe duket se tema e diskutimit ka qenë transferimi i sulmuesit senegalez dhe Tare e ka mbajtur premtimin. Me kontingjentin që ka në dispozicion Flamurtari, duke përfshirë përforcimet si Muarem Muarem dhe Nedeljković, por edhe me lojtarët që kishte në përbërje si Tomislav Busic, Danilo Alves e Sekou Camara, pretendimet e tyre tashmë janë rritur dhe synojnë të fitojnë titullin kampion.