Igli Tare është Drejtori Sportiv më i mirë i dy viteve të fundit në Itali dhe këtë e konfirmon edhe vlerësimi që ka marrë si “Drejtori Sportiv më i mirë në Itali”. Pavarësisht konkurrencës së fortë që kishte dhe arkës së kufizuar tek Lazio në krahasim me skuadrat e tjera, shqiptari ka bërë një punë të jashtë zakonshme duke zbuluar talente.
Numri një i klubit lacial, Claudio Lottito duke parë kërkesat nga klubet e mëdha për të afruar Taren ka vepruar me nxitim për ti rinovuar kontratën, e cila tashmë do të jetë deri në vitin 2020. Lajmi i bërë publik në të përditshmen italiane Gazetta Dello Sport, sipas së cilës kontrata ishte në ditët e fundit të saj dhe zyrtarizmi i akordit ishte vetëm çështje orësh. Ish-sulmuesi i kombëtares shqiptare është një nga bashkëpunëtorët më të afërt të Lottitos, me këtë të fundit që 10 vite më parë kur ish-sulmuesi ishte në prag të përfundimit të karrierës si futbollist, vendosi ta emëronte Taren në postin e drejtorit sportiv.
Igli Tare cilësohet si një njeri shumë i rëndësishëm në strategjitë e klubit. Më shumë sesa fjalët, për Igli Taren flasin faktet, pasi vlonjati në radhët e Lazios ka afruar lojtarë me një kosto të ulët ose të panjohur, të cilët kanë rezultuar në elementë cilësorë që janë vendosur në qendër të vëmendjes së disa klubeve të rëndësishme.
Pikërisht për këto zbulime Tare është nderuar me çmimin “Scouting Leader” nga “Football Leader 2018”, për aftësitë dhe intuitën e tij në zbulimin dhe nënshkrimin me talentet e futbollit, që kanë spikatur me Lazion, duke ndihmuar bardhekaltrit të fitojnë trofe të rëndësishëm, si Keita, Milinkovic-Savic, Felipe Anderson, Luis Alberto e De Vrij dhe Thomas Strakoshës.
