Sot në seancën parlamentare është diskutuar edhe mbi lojërat e fatit, të cilat sipas kryeministrit do të hiqen nga 1 janari 2019.
Deputeti Erion Braçe ka propozuar që të vihet një taksë 30% për të gjitha hotelet apo resortet me 5 yje që kanë edhe kazino.
Kundër këtij propozimi ka qenë deputeti socialist Paulin Stërkaj, i cili tha se e mira është që lojërat e fatit të hiqen për të gjithë:
“Nuk duhet lejuar as ne hotele me 5 yje e as me 6 yje, nëse do hiqet duhet hiqet për të gjithë. Nuk jam dakord as me Braçen për t’ia shtuar në 30% e as me ministrin. Do isha me i hek krejt, as me 65 yje, as me gjashtë yje., këtu po ndajmë shtresat, të pasurit kanë të drejtë me lujt, të varfërt nuk kanë të drejtë”, tha Sterkaj, pas votimit.
Pas këtij diskutimi ka ndërhyrë dhe Rama që shpjegoi pse qeveria ka propozuar një mbështetje për hotelet me 5 yje që janë brand ndërkombëtar që kanë edhe kazino.
“Sot që flasim nuk kemi asnjë hotel me 5 yje, asnjë dhe me 5 yje kam parasysh atë që përmban edhe incentiva, brand global i certifikuar dhe nëse duam të zhvillojmë turizmit dhe të jemi konkurrues në rajon duhet të shikojmë se ca bëjnë të tjerët dhe falë ndryshimeve që kemi bërë në legjislacion, sot kemi potencial prej 15 brandesh globale që kanë shprehur interes për të investuar në vend.
Nuk është mbështetje që qeveria i bën të pasurve, por për ekonominë, se është ajo fashë që sjell të ardhurat, punësim dhe efekt zinxhir në produktivitetin e brendshëm. Do jepnim mesazh të gabuar te investitorët, kjo është arsyeja dhe nuk ka lidhje fare me ndalimin apo lejimin e bixhozit, kur t’i kemi të diskutojmë për rritjen e taksës, por nuk mund të rrisim taksën kur nuk e kemi fare këtë gjë”, u shpreh Kryeministri Rama.
