Jo më larg se dy javë më parë u prezantua linja me çmime të ulëta Tiranë – Budapest – Tiranë, ku u premtua se biletat nuk do të kushtonin më shumë se 20 euro për një destinacion, ose 40 euro për biletat vajtje – ardhje.
Për 30 ditët në vazhdim, një biletë Tiranë – Budapest mund ta gjesh nga 30 deri në 60 euro, por për t’u kthyer nga Hungaria në Shqipëri, nuk gjen biletë më të lirë se 60 euro, apo 18 mijë forinta.
Çmimi shkon edhe deri në 110 euro për fluturimet Budapest – Tiranë. Bileta, që janë jashtë logjikës “low cost”, ofron edhe linja Transavia, e prezantuar disa ditë më parë për fulturimet Tiranë – Amsterdam, shkruan TvKlan.
Bileta më e lirë është 86 euro dhe rritet duke shkuar në 170 apo edhe 250 euro.
Të njëjtat çmime ofrojnë edhe kompani të tjera, të cilat nuk janë “low cost” dhe kanë shërbime me të tjera standarde.
Linjat e Wizz Air kanë çmime për biletat vajtje – ardhje 40 deri në 60 euro për nisjet nga Shkupi dhe Prishtina.
Mësohet se shkak i çmimeve të larta në Shqipëri janë taksat e aeroportit të Rinasit, të cilat janë më të shtrenjta se në Shkup, Prishtinë, Podgoricë apo Beograd.
Në këtë mënyrë, këto taksa kanë arritur të “infektojnë”, brenda një kohe të shkurtër, edhe logjikën e “low cost”, kompanive të krijuar posaçërisht për të konkurruar me çmime të ulëta.
