Deputeti Saimir Tahiri është marrë sot në pyetje në Prokurorinë e Krimeve të Rënda, prej nga ku dalë para pak minutash.
Tahiri ka dhënë një deklaratë të shkurtër për mediet, të cilave u ka kërkuar që të mos e kthejnë në një histori debati politik.
Tahiri falënderoi prokurorët që iu përgjigjën kërkesës së tij për të pasur një hetim sa më të shpejtë në kohë, ndërsa shtoi se është i gatshëm t’i përgjigjet cdo pyetjeje të medies, por nuk dha detaje mbi përmbajtjen e dëshmisë së tij.
FJALA E TAHIRIT:
Së pari dua t’i falënderoj prokurorët që morën parasysh kërkesën time për të pasur një hetim sa më të shpejtë në kohë, sa më të gjithanshëm , sa më të plotë dhe sa më objektiv. Me kërkesën time u paraqita për të dhënë shpjegimet e mia dhe për të shprehur gatishmërinë për t’i shkuar të vërtetës deri në fund me çdo mjet timin dhe disponibilitetin tim personal për t’iu përgjigjur prokurorisë.
Nuk kam ndërmend ta bëj betejën time për drejtësi para jush, apo ta kthej në një histori debati politik. Debati politik lidhur me këtë histori duhet të mbyllet, betejën time e kam me prokurorinë.
Do ju kërkoja që atë që bëra me prokurorët brenda të mos e bëja dhe këtu se është punë dyfishtë, unë jam tërësisht i disponueshëm që t’ju përgjigjem çdo pyetjeje. Do përpiqem me gjithçka kam dhe jam për t’i shkuar deri në fund të drejtës sime.
