Nderim Nexhipi ka surprizuar me zgjedhjen e tij, kur të gjithë prisnin që ish-kapiteni kuq të kthehej te Partizani, ai i është bashkuar Gjicit tek Kukësi. Nexhipi ishte përfolur që do të kthehej në një rol drejtues tek Partizani, këtë gjë e kishte pranuar dhe vetë ai, por duket si gjithçka ka ndryshuar. Kohët e fundit Nexhipi kishte nisur rrugën e menaxhimit të lojtarëve dhe ka lobuar te presidenti Safet Gjici që në krye të skuadrës të emërohet Zekerija Ramadani, trajneri që ka drejtuar në të kaluarën Flamurtarin.
Presidenti i Kukësit, Gjici i ka dhënë Nexhipit pozicionin e drejtorit të përgjithshëm të klubit, gjë të cilën ai mësohet ta ketë pranuar. Nexhipi pritet të ketë një punë të vështirë në krye të verilindorëve, pasi Gjici njihet për temperamentin e tij shpërthyes dhe kërkon me çdo kusht të marrë rezultate. Me ardhjen e Nexhipit në krye të klubit, është pothuajse e sigurtë se Ramadani do të ulet në stol.
