Në “Emirates Stadium” është zhvilluar supersfida e javës së 19 të Premier League, mes Arsenal dhe Liverpool, e cila ka p[ërfunduar në një barazim të çmendur 3-3. Katër nga gjashtë golat janë shënuar në fillimin e pjesës së dytë ku Liverpool edhe pse shkon në avantazhin e dy golave, Arsenal bën mrekullinë në 5’ minuta duke e përmbysur, por që nuk reziston ta mbajë deri në fund. Golat janë shënuar nga Coutinho, Salah dhe Firmino për Liverpool, ndërsa për Arsenal e gjetën rrugën e rrjetës Sanchez, Xhaka dhe Ozil.
Pjesa e parë ka qenë totalisht e dominuar nga “The Reds” të cilët gjetën golin e parë në minutën e 26’ me anë të ylli brazilian, Coutinho. Më pas djemtë e Klopp kishin pafundësi rastesh të arta për ta mbyllur ndeshjen por nuk arrijnë të gjejnë rrjetën.
Në fillim të së dytën në minutën e 52’ është Salah që dyfishon rezultatin me një gol mjaft të bukur, në një kundërsulm. Gol që solli qetësinë tek Liverpool por jo për më shumë se 60 sekonda.
Ishte Alexis Sanchez që prishi festën duke shënuar vetëm një minutë më vonë, pas njëpërgjumje të mbrojtjes së Liverpool.
Tre minuta më vonë do të futet në skenë Granit Xhaka, i cili lëshon një të majtë nga një distancë mjaft e largët dhe kap në befasi Mingolete. Një gol që tregon se pika e dobët e Liverpool mbetet porta.
Ozil vetëm dy minuta pas Xhakës gjen golin e avantazhit pas një kombinimi perfekt me Lacazete dhe i vetëm përballë portës e dërgon topin në rrjetë. Çmendet Emirates, pasi në ndryshim nga pjesa e parë, Arsenali në të dytën ishte magjik.
Ndërsa 20’ minuta para përfundimit të takimit është braziliani Firmino që sjell baraspeshën duke mposhtur Peter Cech. Një pasim perfekt i Can, e nxjerr të vetëm në kufij të zonës dhe Firmino godet mjaft fort duke e bërë të pavlefshëm devijimin që i bën topit portieri i topçinjve.
