E gjithë bota e futbollit, por jo vetëm, po luten për Emiliano Sala, sulmuesi argjentinas i cili u zhduk bashkë me avionin që p udhëtonte drejt Cardiffit. Ai sapo kishte nënshkruar me skuadrën e re,duke u larguar pas disa vitesh nga Nantes në Francë. Por gjatë udhëtimit për t’iu bashkuar skuadrës së re të hënën, avioni me të cilin po udhëtonte Sala është zhdukur.
Shpresat për ta gjetur të gjallë argjentinasin janë shumë të vogla, veçanërisht nëse avioni ka rënë në Channel Islands. Sala, siç ka shpjeguar “Mirror”, ka patur një parandjenjë të keqe. Sulmuesi, në fakt, ka shkuar në Nantes fundjavën e kaluar me të njëjtin avion pasi ka nënshkruar kontratën me Cardiff-in. Siç ka bërë të ditur revista franceze “20 Minutes”, Sala u ka thënë ish-shokëve të skuadrës se e frikësonte ideja se do të udhëtonte përsëri me atë avion, këtë herë për të shkuar në Uells.
Argjentinasi është kthyer në Nanates për t’u përshëndetur me të gjithë dhe për t’u nisur më pas drejt Cardiff-it. Burime afër klubit francez kanë thënë se: “Ka ardhur me avion të dielën dhe të hënën është takuar me të gjithë pjesëtarët e skuadrës. Ka kaluar drekën me të gjithë dhe ka bërë një fjalim frymëzues në fund. Gjithashtu, ka thënë se fluturimi për në Nantes nuk kishte qenë aspak i mirë”.
Duket se sulmuesi ka folur për shqetësimet e tij me ish-shokun e skuadrës, Nicolas Pallois, pikërisht para se të shkonte në aeroport. Ka bërë foton tradicionale me ish-ekipin, atë të lamtumirës, dhe është nisur drejt Uellsit, por avioni i tij është zhdukur kur ka qenë duke fluturuar mbi Channel Islands.
Kërkimet, që kanë zgjatur për 15 orë dhe kanë mbuluar një hapësirë prej 3.000 kilometrash katrorë, janë ndërprerë dhe do të vazhdojnë ditën e nesërme.
