Forcat RENEA kanë mbërritur në Gjirokastër në kërkim të 35-vjeçarit që qëlloi me armë ndaj makinës së policisë.
Po ashtu, helikopterë janë vënë në kërkim të Kostandin Kafiça, i cili ka sulmuar me armë zjarri policinë. Ai është shtetas shqiptar, jetonte prej vitesh në Greqi, i divorcuar dhe dyshohet se vuante nga depresioni.
Ngjarja ndodhi paraditen e sotme, rreth orës 10:00 në krye të fshatit Bularat. Kostandinos Kaçifa fillimisht ka qëlluar me armë zjarri në ajër. Menjëherë në drejtim të vendit nga vinin të shtënat kanë shkuar shërbimet e Policisë të cilat ishin të dislokuara në qendër të fshatit, pasi do zhvillohej aktivitet me rastin e festës së Greqisë.
Kur ka parë automjetin e policisë, Kafiça i ka sulmuar ata e më pas ka arritur të largohet për t’u fshehur në thellësi të fshatit. Para se të largohej për në mal, duke i shpëtuar kështu policisë, 35-vjeçari ka marrë me vete tre karikatorë, ndërsa është veshur me rroba si uniformë ushtrie. Aktualisht fshati është ‘blinduar’ nga Forcat Shqiponja, FNSH si dhe RENEA, ndërkohë që po bëhet krehja e zonës në fjalë, për të bërë të mundur kapjen e Kaçifës.
Njoftimi i policisë:
Rreth orës 10:00 në krye të fshatit Bularat, shtetasi Kostandinos Kaçifa, rreth 35 vjeç ka qëlluar me armë zjarri në ajër.
Menjëherë në drejtim të vendit nga vinin të shtënat kanë shkuar shërbimet e Policisë të cilat ishin të dislokuara në qendër të fshatit pasi do zhvillohej aktivitet me rastin e festës së Greqisë.
Shtetasi Kostandinos Kaçifa porsa ka parë shërbimet e policisë që po afroheshin në drejtim të tij ka hapur zjarr me breshëri ndaj punonjësve të policisë duke rrezikuar jetën e tye.
Fatmirësisht nga të shtënat nuk ka punonjës policie të plagosur, por vetëm është thyer xhami i mjetit të policisë.
Policia menjëherë ka rrethuar zonën ku përsëri ky shtetas ka hapur zjarr në drejtim të punonjësve të policisë që po e ndiqnin.
Shtetasi Kostandinos Kaçifa është futur në thellësi të fshatit ku forcat “Shqiponja” dhe sherbimet e tjera të Drejtorisë Vendore të Policisë vijojnë krehjen e zonës për të bërë të mundur kapjen e tij.
Në ndihmë të shërbimeve të Policisë së DVP Gjirokastër kanë shkuar forcat speciale Renea.
Shtetasi Kostandinos Kaçifa jeton në Greqi dhe ka rreth një javë që ka ardhur në Bularat.
Vijon ndjekja
