Luftëtaret kurde i kanë dërguar një letër të hapur gazetave ndërkombëtare, nëpërmjet së cilës i bëjnë thirrje gjithë botës që të ndalohet sulmi.
“Ne si gra jemi të vendosura të luftojnë derisa të arrijmë fitore e paqe, liri e drejtësi. Ne, gratë e kulturave dhe besimeve të ndryshme nga tokat e lashta të Mesopotamisë, u bëjmë thirrje gjithë popujve të botës që e duan lirinë”, shkruhet në letër.
Ato bëjnë thirrje që të ndalohet sulmi nga Turqia, në mënyrë që të shmangen krime të tjera lufte dhe spastrime etnike.
“Ju shkruajmë nga mesi i luftës në Sirinë verilindore, të detyruara nga shteti turk, në tokën ku jemi autoktonë. Kemi tri ditë që u rezistojmë bombardimeve dhe kemi parë se si nënat janë shënjestruar nëpër shtëpitë e tyre nga bombardimet, teksa kanë qenë duke dalë nga shtëpia për të blerë bukë. Kemi parë bombën të shkërmoqë këmbën e një vajze shtatë vjeçe, bombë që vrau vëllain e saj 12 vjeç”, thuhet ndër të tjera.
Ato iu bëjnë thirrje vendeve perëndimore për ndihmë, teksa shtojnë se vetë do të vazhdojnë të luftojnë deri në fund.
“Po shohim se si kishat e krishtera po bombardohen e po vriten motrat e vëllezërit tanë të krishterë, paraardhësit e të cilëve u mbijetuan gjenocidit të vitit 1915, e tani vriten nga ushtria e perandorisë së re osmane të Erdoganit. Dy vite më parë pamë se si shteti turk ndërtoi një mur 620 km të gjatë përgjatë kufirit, për të detyruar ndarjen e vendit tonë e për të mos i lejuar refugjatët të futen në Evropë”, shkruhet në letrën drejtuar mediave.
