Një burrë ka vdekur dhe të paktën tetë persona janë plagosur, pasi një furgon sulmoi këmbësorët pranë një xhamie në Londrën veriore.
Furgoni hipi mbi trotuar dhe sulmoi një grup njerëzish vetëm pak pas mesnate në xhaminë Finsbury Park. Sipas medieve britanike, një 48-vjeçar është arrestuar, ndërsa kryeministrja Theresa May tha se policia po e trajton rastin si një “sulm të mundshëm terrorist”.
Shumë nga të lënduarit sapo kishin mbaruar lutjet në xhami, ndërsa Këshilli Musliman i Britanisë e quajti sulmin të qëllimshëm.
Kryebashkiaku i Londrës, Sadiq Khan tha se policia po merr masa për të siguruar komunitetet, veçanërisht ata që agjërojnë gjatë muajit të Ramazanit, si dhe kërkoi që njerëzit të ruajnë qetësinë dhe të jenë vigjilentë.
“Ne ende nuk i dimë detajet e plota, por ky ishte qartësisht një sulm i qëllimshëm ndaj londinezëve të pafajshëm, shumë prej të cilëve po mbaronin lutjet gjatë muajit të shenjtë të Ramazanit. Ndërsa ky duket të jetë një sulm ndaj një komuniteti të caktuar, në fakt është një sulm ndaj të gjitha vlerave tona të përbashkëta të tolerancës, lirisë dhe respektit”, tha kryebashkiaku.
Shoferi i automjetit u arrestua rreth orës 00:20, ndërsa policia hodhi poshtë spekulimet se shoferi kishte sulmuar edhe me thikë, pasi nuk kishte asnjë person që kishte plagë për shkak të armëve të ftohta.
Një dëshmitar tha: Ai erdhi drejt nesh, aty kishte shumë njerëz. Dikush tha që të largoheshim. U shokova, kishte gjithandej trupa rreth meje. Falë Zotit unë u largova, thjesht u hodha. Të gjitha janë lënduar./ Tirana Today
[ngg_images source=”galleries” container_ids=”212″ display_type=”photocrati-nextgen_basic_imagebrowser” ajax_pagination=”1″ order_by=”sortorder” order_direction=”ASC” returns=”included” maximum_entity_count=”500″]
