Anglia ka siguruar një biletë për në gjysmëfinale pasi ka mposhtur Suedinë me rezultatin e pastër 2-0 në “Samara Arena”. Një kualifikim historik për “Tre Luanët” pasi nuk ndodhte që nga viti i largët 1990. Anglezët duhet të presin të luhet ndeshja e darkës mes Rusisë dhe Kroacisë për të njohur kundërshtarin.
Një ndeshje që fillon me dominimin e anglezëve dhe janë ata që krijojnë raste të rrezikshme, nga ana tjetër Suedia përpiqet të shfrytëzojë taktikën mbrojtëse dhe më pas kundërsulmin, por që nuk funksionoi.
Në minutën e 30’ është Maguire që ndëshkon skandinavët me një goditje me kokë në zonë. Një gol që vjen nga goditje standarde, pika më e fortë e suedezëve, por që shtatlartësia e Maguire i mposhti dhe portieri Olsen nuk mund të bënte asgjë.
Më pas, kur kronometri tregoi një orë lojë, anglezët shënuan golin e dytë, sërish me kokë, nga Delle Ali, i cili shfrytëzoi shumë mirë një krosim të mrekullueshëm nga Jesse Lingard.
Anglezët do të ndeshen në gjysmëfinale me fituesen e përballjes së mbrëmjes Rusi-Kroaci.
