Kryeministrja e Suedisë, Magdalena Andersson, njoftoi të hënën se vendi do të ofrojë 1 miliard krona suedeze (93.8 milionë dollarë) ndihmë për Ukrainën, duke përfshirë ndihmën ushtarake dhe civile.
Gjysma e paketës së ndihmës shtesë, 500 milion krona suedeze (46.9 milion dollarë) do të ofrojë ndihmë ushtarake.
“Kufijtë nuk duhet të ndryshohen kurrë me forcë apo luftë. Dhe është detyra dhe nderi ynë t’ju mbështesim”, tha Andersson në një konferencë shtypi në Stokholm, pasi priti ministrin e Jashtëm të Ukrainës Dmytro Kuleba.
Kuleba përsëriti kërkesën e Ukrainës që Suedia të sigurojë sisteme të mbrojtjes ajrore dhe më shumë predha, duke shtuar se “për sa kohë që lufta të vazhdojë, ne do të kërkojmë më shumë armë për arsye të dukshme, për të mbrojtur Ukrainën, por edhe për të mbrojtur tërë Evropën”.
Burimi i lajmit: CNN. Përshtatur nga Tirana Today
