Një përballje mjaft interesante do të zhvillohet sonte në “Friends Arena”, ku Italia do të udhëtojë drejt Suedisë me misionin e Kupës së Botës dhe të atë të “hakmarrjes”. Cilësohet “hakmarrje”, për atë barazim 2-2 mes Suedisë dhe Danimarkës në vitin 2004, që la jashtë Italinë. Por këtë herë Suedia do të jetë pa Ibrahimovic, që ishte udhëheqësi i ekipit asokohe, por ata kanë treguar se kanë një grup lojtarësh mjaft të fortë përderisa e mbyllën grupin pas Francës dhe para Holandës, ku këta të fundit nuk do të jenë pjesëmarrës në Rusi. Ndërsa Italia e Venturas u rendit në grupin H, pas Spanjës, grupi ku bënte pjesë edhe Shqipëria që e mbylli në vendin e tretë.
Do të jetë një sfidë mjaft e luftuar duke parë edhe prononcimet e trajnerëve respektive Andersson dhe Venturës. Italiani nuk e ka llogaritur Suedinë dhe ka menduar për paraqitjen në fazën e grupeve, nga ana tjetër suedezi është shprehur se jemi gati për tu përballu me Italinë. Italia mund të mos ketë në fushë sulmuesin më në formë të momentit Zazën, i cili një ditë më parë u largua nga stërvitja për një problem në gjunjë. Ndërsa Andersson ka të gjithë grupin në dispozicion dhe përpiqet të bëjë surprizën në ndeshjen e parë që do të zhvillohet në Suedi.
Shifra dhe Fakte
– Italia është e pamposhtur në 6 ndeshjet e fundit të luajtura kundër Suedisë: 5 barazime dhe 1 fitore.
– Përballja e fundit mes këtyre dy skuadrave ka qenë në fazën me grupe të Euro 2016. Një gol i Eder në minutat e fundit i ka dhënë Italisë fitoren 1-0.
– Suedia ka një ecuri shumë të mirë në ndeshjet e luajtura në shtëpi kundër italianëve: 4 fitore, 3 barazime dhe 1 humbje.
Po ashtu mediat italiane kanë publikuar edhe formacionet e mundshme se si mund të zbresin këto dy ekipe në fushë, për të kërkuar një biletë për në botërorin që organizohet vitin e ardhshëm në Rusi.
Formacioni i mundshëm i Suedisë: Olsen; Krafth, Lindelof, Granqvist, Augustinsson; Claesson, Larsson, Ekdal, Forsberg; Berg, Toivonen
Formacioni i mundshëm i Italisë: Buffon; Barzagli, Bonucci, Chiellini; Candreva, Parolo, De Rossi, Verratti, Darmian; Immobile, Belotti
