Një studim i fundit botuar në revistën “Anestezia” (Anaesthesia), ka dalë në përfundimin se mungesa e gjumit mund të ndikojë në gjenet tona, dhe kjo lidhet me dëmtimin e ADN-së. Për të arritur në këtë përfundim, është dashur ndërhyrja e 49 mjekëve të turnit të natës, gjaku i të cilëve është analizuar disa herë në kohë të ndryshme.
Studimi është realizuar nga Siu-Wai Choi, profesor në Universitetin e Hong-Kongut. Analizat treguan se aktiviteti i gjeneve që shërbejnë për të prodhuar proteinat e riparimit të ADN-së, zvogëlohej te mjekët që bënin turnin e natës.
Dëmtimi i ADN-së për shkak të mungesës së gjumit, mund të shpjegojë rritjen e rrezikut të shumë sëmundjeve (p.sh. diabeti, sëmundjet neurodegjenerative dhe ato kardiovaskulare) që lidhen me çrregullimet e gjumit.
“Edhe pse studimi është një punë në fazë paraprake, është e qartë nga rezultatet se edhe një natë e vetme pa gjumë, mund të favorizojë ndryshime që ndikojnë në zhvillimin e sëmundjeve kronike”, thotë autori i studimit.
