Më tepër se 3 javë pushime në vit, është koha e mjaftueshme për të reduktuar 37 % rrezikun e vdekjes. Në këtë përfundim ka arritur një studim finlandez, i cili është prezantuar në Kongresin Europian të Kardiologjisë, dhe së shpejti do të publikohet edhe në revistën shkencore “The Jopurnal Of Nutrition, Health and Aging”. Kërkuesit janë të mendimit se pushimet që zgjasin me tepër se 3 javë, kanë një efekt shumë të fuqishëm antistres dhe mbrojtës për shëndetin fizik e mendor.
“Nuk mjafton vetëm një stil jetese i shëndetshëm për të kompensuar orët e tepërta të punës dhe mungesën e pushimeve”, theksojnë ekspertët e Universitetit të Helsinkit.
Studimi është kryer për 10 vjet dhe është vëzhguar jeta e rreth 1300 meshkujve, që siç dihet, janë më të ekspozuar ndaj sëmundjeve kardiovaskulare se femrat. Pas një sërë kërkimesh, ka rezultuar se pushimet e gjata ulin ndjeshëm rrezikun e prekjes nga sëmundjet kardiovaskulare, por edhe të stresit psikologjik, si dhe ndikojnë në përmirësimin e cilësisë së gjumit dhe produktivitetit në punë.
