Në rast se nuk e keni dëgjuar, studiuesit në Kolegjin Dartmauth kanë një sekret për të ndarë me ju. Pavarësisht nga reputacioni negativ, një studim i ri ka zbuluar se thashethemet mund të jenë vërtet një gjë e mirë kur përhapen midis njerëzve.
Autorët e studimit, thonë se thashethemet nuk kanë të bëjnë vetëm me transmetimin e thashethemeve dhe gjërave negative apo të këqija për të tjerët. Në fakt, studimi zbulon se ato shërbejnë gjithashtu për të krijuar lidhje shoqërore, dhe madje i ndihmojnë njerëzit të mësojnë gjëra të reja për botën.
“Thashethemet, janë një formë komplekse e komunikimit që shpesh keqkuptohen. Por në fakt ato mund të jenë një mjet i lidhjes shoqërore, dhe shumë thelbësore përtej konotacionit tipik negativ që ato kanë”- thotë studiuesi Eshin Xholi.
Ndërsa shumë njerëz i lidhin thashethemet me zbulimin e sekreteve të sikletshme për dikë, studiuesit shtojnë se ato mund të përfshijë gjithashtu biseda të vogla personale ose në internet, si për shembull zhvillimi i një bisede private në platformën Zoom.
Studimet e mëparshme, kanë zbuluar se rreth 14 për qind e bisedave ditore të njerëzve klasifikohen si thashetheme, dhe shumica e tyre janë neutrale në tonin e tyre. Nga mediat sociale tek puna nëpër zyra, duket sikur njerëzit thjesht nuk mund të ndalen së shkëmbyeri informacione për veten dhe të tjerët.
Xholi dhe asistent/profesori i shkencave psikologjike dhe të trurit Ljuk Çang kryen një studim për të kuptuar se çfarë funksioni social kanë thashethemet. Ekipi krijoi një lojë në internet për të studiuar se si zhvillohen thashethemet kur informacioni bëhet më i pasigurt me kalimin e kohës.
Pjesëmarrësit luajtën 10 raunde të lojës në grupe me nga 6 persona. Në çdo raund, lojtarët morën nga 10 dollarë dhe mund të zgjidhnin t’i mbanin paratë ose të investonin një pjesë të tyre tek fond i përbashkët i grupit. Ky fond do të shumohej me 1.5 herë, dhe pastaj do të ndante kursimet totale në mënyrë të barabartë midis 6 lojtarëve.
Studiuesit thanë se loja në vetvete krijonte tension midis lojtarëve egoistë dhe atyre bashkëpunues. Teste të tilla janë ato që shkencëtarët i quajnë loja e të mirave publike. Në disa raste, loja e kufizonte informacionin, në mënyre që lojtarët të kishin mundësi të vëzhgonin vetëm sjelljen e disa shokëve të tjerë të skuadrës.
Gjatë disa lojërave, lojtarët mund të bisedonin privatisht me dikë tjetër në grupin e tyre. Kjo gjë u dha mundësi të bënin thashetheme se si po silleshin pjesëmarrësit e tjerë; duke identifikuar se kush ishte më egoist dhe kush po e ndihmonte ekipin.
Pas garës, lojtarët deklaruan se sa të gatshëm do të ishin të luanin përsëri me secilin lojtar në grupin e tyre.“Frymëzimi ynë, ishte krijimi i një skenari të ngjashëm me jetën, në të cilin ju jeni një anëtar i një komuniteti dhe prekeni nga veprimet e të gjithë anëtarëve të tjerë të komunitetit, por që shumicën e tyre i vëzhgoni rrallë apo që angazhoheni drejtpërdrejt me ta”- thotë Xholi.
Atëherë, përse njerëzve u pëlqen kaq shumë të bëjnë thashetheme?Autorët e studimit thonë se rezultatet e tyre tregojnë se thashethemet janë një “komunikim i pasur, i shumanshëm”, dhe që kanë shumë funksione brenda grupeve sociale.
Gjatë lojërave, shfaqeshin lloje të ndryshme thashethemesh, në varësi të sasisë së informacionit që kishin në dispozicion lojtarët. Në lojërat ku lojtarët kishin pak informacione në lidhje me zgjedhjet e shokëve të tyre të skuadrës, studimi zbulon biseda më spontane për të tjerët.
Kur lojtarët kishin mundësi të shihnin se çfarë bënin të gjithë anëtarët e grupit me paratë e tyre, bisedat kaluan në një larmi temash neutrale. Gjithashtu pjesëmarrësit u mbështetën në informacionin e dorës së dytë që vinte nga lojtarët e tjerë, sidomos kur nuk mund të shihnin se çfarë po bënin disa shokë të ekipit për veten e tyre.
Studiuesit thonë se kjo demonstron se si thashethemet i ndihmojnë njerëzit të mësojnë nga përvojat e një personi tjetër. “Duke shkëmbyer informacione me të tjerët, thashethemet janë një mënyrë për të krijuar marrëdhënie.
Ato përfshijnë besimin e ndërsjelltë dhe e lehtësojnë një lidhje shoqërore që përforcohet, teksa zhvillohet komunikimi i mëtejshëm”- thotë Çang. “Thashethemet mund të jenë të dobishme, pasi i ndihmojnë njerëzit të mësojnë përmes përvojave të të tjerëve, ndërsa u japin atyre mundësi që të jenë më pranë njëri-tjetrit”-shton Xholi.
Burimi i lajmit: https://www.studyfinds.org/gossip-help-people-learn-bond/
Përshtatur nga TIRANA TODAY
