Gjykata ka vendosur masën e sigurisë “arrest në burg” për reperin Stresi. Ai u arrestua ditën e djeshme në një hotel në Linzë. Policia tha se ajo ishte nën shoqërinë e një vajze 20-vjeçare me inicialet P.Ç.
Arkimed Lushajt do të përballet me drejtësinë. Gjatë kontrollit në hotelin ku po qëndronte atij i janë gjetur në posedim, një pistoletë, disa fishekë dhe një sasi e vogël kokaine.
Ai ishte nën përgjim prej disa muajsh dhe ishte kapur teksa komunikonte me disa persona për trafikun e drogës.
Po kështu në përgjimet ambientale dhe ato telefonike Stresi është kapur duke orientuar shitësit të çojnë drogë në disa vende kryesisht lokale.
Avokati i tij Marash Ibraj, e ka cilësuar arrestimin e klientit të tij të paligjshëm. Ai ka folur me tone të ashpra për Policinë e Shtetit. Ai ka folur për publikimin e pamjeve ku reperi dukej i zhveshur, i mbuluar vetëm me çarçafë nga dhoma e hotelit.
Në përgjimet të prokurorisë, rezulton se Stresi ishte në dijeni që ishte në përgjim dhe u ka kërkuar ndihmë Bajrajve.
Ai mësohet t’u ketë telefonuar dhe t’u ketë thënë:
“Më ndihmoni të iki jashtë se policia po me përgjon, se sa pashë që po më afroheshin unë e hodha armën”.
Kjo telefonatë e përgjuar nga Prokuroria e Krimeve të Rënda është zhvilluar me një prej anëtarëve të bandës Bajraj.
Pak javë më parë në gjimnazin “Partizani” në kryeqytet u gjet e hedhur një armë zjarri. Policia dyshonte se i përkiste reperit dhe për këtë arsye kishte kërkuar arrestimin e tij.
Ai u kishte kërkuar ndihmë bandës së famshme të Shkodrës për t’u larguar jashtë vendit pasi ishte në dijeni se donin ta arrestonin.
