Dy vajza kanë tentuar t’i japin fund jetës me anë të medikamenteve të ndryshme mjekësore. Ngjarjet kanë ndodhur në Tiranë dhe në Rrogozhinë, por fatmirësisht për të dyja rastet, vajzat janë diktuar në kohë nga familjarët, të cilët i kanë dërguar me urgjencë në spital.
Për të dyja ngjarjet mësohet se shkaku është stresi i akumuluar nga provimet që kishin në shkollë.
Sipas policisë, ngjarja e parë ka ndodhur në Rrogozhinë, ku një maturante 17-vjeçare me iniciale N.K., ka pirë disa ilaçe të së ëmës, të cilat i përdorte për tensionin e lartë, duke përfunduar në spitalin e Kavajës, në gjendje të rëndë.
Ndërhyrja në kohë ka bërë që vajza të shpëtojë dhe momentalisht është jashtë rrezikut për jetën. Edhe prindërit kanë deklaruar se kohët e fundit 17-vjeçarja ishte shumë e stresuar për shkak të provimeve që po i afronin, por ishte edhe natyrë e mbyllur që nuk fliste me njeri.
Për të njëjtën arsye ka tentuar të vrasë veten edhe F.I., 21 vjeçe, banuese në Allias, Tiranë.
Studentja e Ekonomikut kishte shumë provime për të dhënë, ndërsa familjarët thonë se vajza po kalonte një gjendje të rënduar psikologjike, që për pak e çoi drejt vetëflijimit.
