Juventusi mposhti Lazion të dielën në mbrëmje me përmbysje në ‘Olimpico’, ku gjithçka u vendos nga penalltia e Cristiano Ronaldos. Trajneri i të kaltërve, Simone Inzaghi pas ndeshjes ka shënjestruar portierin Thomas Strakosha. Fjalët dhe përmbajtja e tekstit shpeshherë janë të ditura, shumë përpara se italiani të shkojë në konferencën për shtyp dhe kjo e ka bërë të duket qesharak.
Nëse ka triumf, vetëm atëherë disa fjalë mund të jenë spontane dhe të paparashikueshme, por kur është ndjenja e presionit në një humbje, Inzaghi nuk ndryshon shumë. Për herë të tretë gjatë këtij sezoni, në një situatë të vështirë ku trajneri i Lazios duhet të shpjegojë se përse ekipi i tij humbi, justifikimi është i njëjtë: “Strakosha nuk bëri asnjë pritje”.
“Këtë vit unë nuk e mbaj mend Juventusin më të vështirë se sot, në Itali dhe në Evropë, futbolli është mizor, kështu që duke luajtur deri në fund ne do t’i japim kënaqësi tifozëve. Nuk mbaj mend asnjë pritje nga Strakosha, kur pësohet gol ka gjithmonë një gabim”, u shpreh Inzaghi, ndërsa një shprehje të tillë identike, e ka përdorur për të tretën herë gjatë këtij sezoni.
