Organizata Botërore e Shëndetësisë (OBSH) është shprehur se ka pak prova që tregojnë se ndryshimi i stinëve ndikon në përhapjen e koronavirusit.
“Nuk mund të mbështetemi në shpresat se sezoni ose temperatura do të jenë përgjigja e kësaj. Për momentin, nuk kemi të dhëna që sugjerojnë se koronavirusi do të sillet në mënyrë më agresive ose jo kur sezoni të ndryshojë”, tha udhëheqësi i programit të emergjencave në OBSH, Mike Ryan.
Kujtojmë se në fazat e para të pandemisë së koronavirusit, disa ekspertë u shprehën se koha e nxehtë mund ta ngadalësojë përhapjen e tij. Por, kjo ide është zbehur pasi koronavirusi ka vazhduar të përhapet në hemisferën veriore edhe gjatë pranverës.
Ryan po ashtu tha se mungesa e pajisjeve personale mbrojtëse mbetet një problem madhor në nivel global.
“Sistemet shëndetësore në disa vende janë duke luftuar dhe ndodhen nën presion të madh”, shtoi ai.
