Sir Alex Ferguson është i emocionuar nga plani i Aberdeen-it për të ndërtuar një statujë në nder të tij.
Zyrtarët e klubit thotë se monumenti prej bronzi jashtë stadiumit Pittodrie do të jetë i pari në një seri, për të nderuar heronjtë e klubit. Statuja do të skalitet nga Andi Eduards dhe do të bazohet në një fotografi të Sir Alex duke festuar suksesin e titullit të Aberdeen-it në vitin 1980, në Easter Road.
Sir Alex, i cili fitoi 10 trofe të rëndësishëm në tetë vjet në Pittodrie, para se të vazhdonte të triumfonte me Manchester United, tha:
“Unë jam i emocionuar dhe i nderuar nga ky vlerësim nga Aberdeen Football Club, ku kalova një pjesë fantastike dhe të paharrueshme të karrierës sime. Jam veçanërisht i kënaqur me imazhin në të cilin klubi ka zgjedhur të bazojë statujën dhe me zgjedhjen e skulptorit, puna e të cilit së fundmi është tepër realiste. Mezi pres ta shoh!”
Presidenti Dave Cormack shtoi: “Ne filluam të eksplorojmë idenë e një seri statujash, për të njohur ato legjenda që patën një ndikim të madh në klub, që 18 muaj më parë, por procesi ngeci për shkak të pandemisë. Tani ai është përsëri në axhendën tonë dhe kur erdhi puna për të vendosur se kush do të ishte i pari, natyrisht ekzistonte vetëm një mundësi, Sir Alex Ferguson.”
Skulptori Eduards dhe kompania e tij ‘Cornovii Eduards’ më parë kanë krijuar buste të personave si “The Beatles” në Liverpool, Sir David Attenborough, Sir Stanley Matthews dhe Muhammad Ali.
