Kampionati shqiptarë startin e tij, pas mini-fazës përgatitore të dimrit e bën me një ndeshje mjaft të bukur. Partizani do të udhëtojë drejt Vlorës për të treguar se ka bërë kthesën. Shumë lojtarë u larguan nga ekipi dhe shumë të tjerë u afruan, mbetet për tu parë nëse është përmirësuar apo jo. Nga ana tjetër Flamurtari ka bërë një merkato të fortë dhe objektivat janë më të mëdha se në fillim të sezonit. Trajneri i të kuqëve Sulejman Starova në prag të ndeshjes është shprehur se ekipi është konsoliduar më shumë dhe se tani do të vijnë sukseset.
Shpresojmë që të gjithë lojtarët e afruar në merkaton e dimrit të përshtaten sa më shpejt. Flamurtari ka filluar një sezon me financa të fuqishme, teksa duket më agresiv së më parë. Duke llogaritur që distanca jonë me Flamurtarin është vetëm 4 pikë, kjo tregon se kemi mundësi të arrijmë rezultate shumë të mira. Sigurisht, me përforcimet e janarit, skuadra vlonjate bëhet edhe më e fuqishme, synon lart me objektivat që ka. Sidoqoftë, ne do të tentojmë të marrim pikët që na duhen.
Largimet dhe afrimet te Partizani?
Mund t’ju them se nuk jemi dobësuar në merkaton e dimrit, të tjerat do t’i tregojë koha. Pas largimit të disa futbollistëve, skuadra mori për mirë.
Përplasja me Trashin?
Trashi kthehet të jetë pjesë e skuadrës, pasi ka bërë autokritikë. Këto janë dukuri që ndodhin në gjithë botën, jo vetëm te ne. Trashi është pjesë e Partizanit.
Largimi i tre lojtarëve Krasniqi, Malota dhe Vila?
Për lojtarët e larguar mendoj se është një kapitull i mbyllur. U uroj suksese atyre që kanë ikur dhe tani flasim vetëm për ata që kemi në dispozicion.
Sfidë personale me Duron?
Nuk ka sfidë personale me Duron. Nuk ka përplasje mes nesh. Puna e trainerit matet me rezultate dhe në fund të shohim. Nuk e di pse ka kaq kuriozitet për faktin, nëse do ta takoj apo jo Duron. Mysafiri pritet, nuk shkon mysafiri t’i japë dorën pritësit.
Edgar Çani?
Vlerat e tij ishin llogaritur si lojtar që do të bënte diferencën. E them se e ka vuajtur edhe ai, personalisht. Mjekët thonë se ka kaluar me sukses. Fakt është se ka nisur stërvitjen dhe në fund të javës vjen dhe i bashkohet skuadrës. Nuk ka më probleme me gjurin.
Shumë ndryshime në skuadër , rrezikon Partizani të pësoj fatin e Tiranës?
Partizani nuk është si Tirana. Tirana fali 6 pikë dhe tifozët e braktisën. Më pas e sulmuan dhe gjyqtarët. Nuk kishte skuadër për të rënë nga kategoria, por për disa arsye ra. Nuk jemi në situatën e Tiranës. Partizani ka larguar lojtarë që nuk luanin, kurse tani ka konkurrencë. Partizani synon trofe dhe Europën.
