Kampionati shqiptar rezervon sfida mjaft të bukura ditën e enjte ku kampionët në fuqi,Kukësi do të kërkojnë të thyejnë Kamzën e vendi të katërt në shtëpi dhe të vazhdojnë ndjekjen e Skënderbeut duke shpresuar tek një dhuratë nga Flamurtari. Ndërsa për rikthimin e Starovës në krye të Partizanit kundërshtari i parë është i njëjtë, Laçi.
Kamza-Kukësi : Në përballjen e fazës së parë kuksianet kanë fituar me një gol të shënuar nga Elis Bakaj nga pika e bardhë e penalltisë. Por kjo do të jetë një përballje krejt ndryshe nga ajo e fillimit të kampionatit, pasi Kamza ka treguar karakter dhe ka arritur të përballojë të gjithë kundërshtaret dhe mbanë vendin e katërt me 15 pikë dhe në rast fitoreje ditën e nesërme do të barazohej me pikë me Kukësin. Por këta të fundit e dinë mjaft mirë që nuk duhet ta nënvlerësojnë këtë ekip që ka arritur ti mbajë barazimin Skënderbeut të mundë Vllazninë dhe Partizanin, duke i dhënë goditjen finale italianit Iuliano për të lenë stolin e të kuqve. Është e katërta në renditje, me një diference të ndjeshme nga vendi i pestë për numrin e pikëve të grumbulluara dhe ka mbrojtjen më të mirë të kampionatit. Shifra të një ekipi që do të ishte gabim të nënvlerësohej pavarësisht se përballë do të ketë Kukësin, kampionët në fuqi por dhe një prej ekipeve më të suksesshme shqiptare në vitet e fundit. Fakti që skuadra e Milinkovicit vjen pas 2 barazimeve radhazi ka bërë që fitoren te Kukësi në këtë ndeshje ta konsiderojnë një detyrim, për të nisur një kthesë me objektiv kreun e Skënderbeut dhe përballë surprizës së këtij sezoni mund të ishte starti i duhur i një ngushtimi të diferencës me korçarët.
Laçi-Partizani: Për ironi të fatit sa herë Sulejman Starova e ka marrë ekipin e Partizanit në dorë në mesin e kampionatit kundërshtari i tij i parë ka qenë Laçi. Kurbinasit që herë u kanë hapur probleme e herë janë toleruar mes tyre. Por këtë vit mund të kemi një luftë më të fortë duke parë pozitat ku ndodhen të dyja ekipet. Në përballjen e fazës së parë Laçi ka mposhtur Partizanin me rezultatin 2-0 në “Selman Stermasi”, por këtë herë përballja do të ketë fytyrë tjetër. Pasi me rikthimin e Starovës në krye të pankinës pritet të ketë ehe një stil tjetër loje, një Partizan më kërkues dhe një rival të denjë. Pasi këtë gjë e ka bërë mjaft mirë në vitet e shkuara edhe pse nuk arriti të shpallet kampion. Të dyja ekipet në fazën e parë kanë arritur të grumbullojnë nga 11 pikë dhe lufta e tyre nesër do të zhvillohet për vendin e pestë. Partizani do të udhëtojë drejt Laçit ditën e nesërme për të bërë kthesën e madhe, pas ndryshimeve të shumta në pankinë, por edhe formacioni që do të zbresë në fushë pritet të ketë shumë ndryshime. Nga ana tjetër Laçi do të kërkojë të luftojë fort për të rritur objektivin e përhershëm, një vend ë Europë duke parë që gara për ta arritur përmes Kupës është akoma më e vështirë.
TIRANA TODAY
