Sot, zyrtarisht Milani nuk është më i Berluskonit, nuk është më i njeriut, i cili e krijoi Milanin e madh, djallin e vërtetë. Kinezët janë pronarët e rinj të ekipit më të madh të Italisë.
350 mln euro investime për Milanin e ri, ky ishte premtimi që presidenca e re dha për merkaton e verës. Milani kohët e fundit pësoi një rënie të madhe dhe kjo solli edhe moskualifikim për në Ligën e Kampionëve, për disa vite me rradhë. Kjo ishte arsyeja që Berluskoni çoi ndër mend shitjen e klubit të tij.
“Një Milan që nuk luan në Champions, nuk është Milan”,- pati deklaruar Berluskoni kur zyrtarizoi lajmin se po merr oferta për Milanin e tij. “Shumë shpejt mund të mos jem më president i Milanit por do jem tifozi më i madh i saj. Milani është jeta ime, çdo ditë e jetës sime nis me këtë emer, Milan. Nuk e di se ç’po ndodh këto vitet e fundit, por shpresoj të jetë fundi i një epoke dhe jo fundi i Milanit. Mos ma quani Milanin të dobët, thoni Berluskoni u lodh duke e mirëmenaxhuar. Nuk dua që të më mallkojë Milani dhe tifozët e tij, pasi unë qesh dhe qaj së bashku me ta. Le ta lë në një dorë tjetër dhe të rreshtohem në radhë për ta parë se ç’do më ofrojë si një tifoz i thjeshtë. Të dua Milani im, të uroj të jesh akoma më i fortë pa mua”, –përfundoi ish-presidenti i Milanit për 31 vite.
Numrin 1 i Milanit tani është Yonghong Li, i cili kishte kohë që provokonte Berluskonin për ta bindur në shitjen e Milanit. Berluskoni tërhiqet pasi transformoi Milanin në një nga klubet më të titulluara në botë. Periudha e tij si president, e quajtur si “Era Berluskoni” u mbyll me një total prej 29 trofesh në 31 vite.
Milani me Berluskonin si president arriti të fitojë:8 Seria A, 7 Super Coppa di Italia, 5 Uefa Champions Lig, 5 Super Kupa Europe, 2 Kupa Bote për Klube, 1 Kupe Intercontinental dhe 1 Coppa Italia.
Yonghong Li është presidenti i 22 në historinë e Milanit dhe teksa është emëruar si president i ri, ka falenderuar Berluskonin që i besoi. Por presidenti i ri nuk ishte i vetmi që e falënderoi Berluskonin, pasi ishin edhe lojtarë të tjerë të mëdhenj të Milanit, si :
Rikardo Kaka – Ai shkruante në Instagram: ” Një nder që kam qenë pjesë e një afati fitues dhe plot gëzim. Faleminderit President Silvio Berlusconi”.
Maldini- Kapiteni legjendar i “Erës Berluskoni” falënderoi duke thënë: “Faleminderit për gjithçka President. Milan gjithmonë në zemer.”
Nesta (instagram):”Faleminderit Berlusconit dhe Gallianit që më bënë mua pjesë të një historie kaq të gjatë dhe të lavdishme.”
Suso (Instagram): “Faleminderit për gjithçka. Nuk do të jetë askush si ju. Historia është shkruar.”
Boateng (Instagram): Faleminderit për gjithçka. Përgjithmonë Kuq e Zi.
Tifozëve të Milanit nuk u mbetet gjë tjetër, veçse të shprehin falenderimet e përzemërta, pasi çdo ekip do e dëshironte një president si Silvio Berluskoni.
Speciale nga Dritan Ceveli / Tirana Today
