Spanja dështoi në një provë që në letër dukej e lehtë si Rusia në fazën e 1/8-ve të Botërorit dhe tashmë e ka mbyllur këtë aventurë. Fillimisht u duk se kualifikimi do të ishte i thjeshtë, pas avantazhit që në fillim të pjesës së parë, por rusët reaguan dhe me shumë forcë e çuan deri tek penalltitë ku dhe mposhtën iberikët.
Pas eliminimit ka folur menjëherë kapiteni i spanjollëve, Sergio Ramos, ku u shpreh mjaft i mërzitur dhe i zhgënjyer nga gjykimi i ndeshjes. Ishin disa momente gjatë ndeshjen ku iberikët pretenduan për diçka më shumë, por arbitri Kuiper dhe VAR nuk i vlerësuan të tilla.
“Jemi shumë të zhgënjyer. Ky është një nga momentet më të vështirë të jetës sime. Por janë gjëra që ndodhin. Jam krenar që jam spanjoll. Ishte një ndeshje e vështirë, dominuam, patëm mundësi për të fituar por nuk arritëm të shfrytëzonim rastet e krijuara.
Të gjithë ëndërronim të ngrinim trofeun. Gjithsesi, jam krenar për shokët e mi, krenar për Spanjën, dhe shpresoj që edhe tifozët në stadium dhe në Spanjë ta kenë parë se u munduam me të gjitha mënyrat për të fituar. Ata duhet të jenë krenarë”, ka thënë Ramos.
