Kryeministri, Edi Rama, e ka nisur ditën me postimin e një mesazhi special për policinë e shtetit, duke i quajtur “engjëj mbrojtës”. Postimi, vetëm tre orë para se të fillojë protesta e opozitës, në të cilën kryetari i Partisë Demokratike, Lulzim Basha, ka deklaruar dje se policia do të filmohet nga toka dhe nga ajri për sjelljen e saj.
Mesazhi i kryeministrit Rama në Facebook:
“Mirëmëngjes dhe ju uroj një ditë të mbarë me këtë imazh të një prej “engjëjve mbrojtës” të rregullit në rrugët e vendit
Ermela Lika, pasi ka kryer me rezultate të shkëlqyera, Akademinë e rilindur të Sigurisë, është bërë pjesë e ‘Policisë Që Duam’, bashkë me 888 gratë dhe vajzat me gradë, të cilat i janë bashkuar forcave të rendit tre vitet e fundit.
Mirënjohje dhe respekt për çdo punonjës të Policisë së Shtetit, që me përkushtimin dhe profesionalizimin e saj apo të tij, ka bërë të mundur kthimin e besimit të qytetarëve tek uniformat blu.
Shumë është bërë. Ende më shumë mbetet për t’u bërë. Por edhe shumë ka për të humbur nëse ndalemi sot. Prandaj përpara për ‘Shqipërinë Që Duam'”
