Sot është 100 vjetori i vdekjes së Ismail Qemalit, babait të kombit shqiptar, i cili mbylli jetën më 24 janar të vitit 1919, në moshën 75 vjeçare, në Peruxhia të Italisë.
Sipas ekspertizës mjekësore, Ismali Qemal Vlora vdiq nga shkaqe natyrale. Ai pësoi hemorragji cerebrale të shoqëruar me paralizë, një sëmundje, shenjat e së cilës, kanë shtyrë shumë shqiptarë të mendojnë, por edhe të emetojnë mendimin, se Ismail Qemalin e helmuan.
Për ngjarjen pati një lajmërim të shkurtër në gazetën “L’unione Liberale” të Peruxhias, shkruar dhe konceptuar në mënyrën më mjeshtërore të mundshme, ku sqarohet edhe ekspertiza e disa prej mjekëve italianë më të zotë të kohës. Ja teksti i plotë:
“Natën e shkuar, më 26 janar, rreth orës 23:30 pushoi së jetuari, në hotelin “Brufani”, mysafiri i shquar i qytetit, Ismail Qemal Beu nga Vlora.
Përfaqësonte denjësisht një familje të madhe dhe të lashtë nga Vlora, dhe pse patriot i zjarrtë, që ishte mik i Italisë sonë, i frymëzuar nga parimet e lirisë dhe drejtësisë, nuk ishte i pëlqyer nga Qeveria Turke, që e kishte dënuar dhe detyruar të kërkonte shpëtim në mërgim.
Në 75 vitet e moshës ai konservonte gjithë kthjelltësinë e mendimit dhe forcën e trupit, palodhshmërinë në punë, si të të rinjve si dhe elegancën më të shkëlqyer dhe dashamirësinë me të gjithë.
Në datën 23 në mbrëmje ai u godit nga hemorragjia cerebrale e shoqëruar me paralizë. Kundër sëmundjes së rëndë nuk mjaftoi, as mjekimi tepër i kujdesshëm i mjekut kurues Dr. Leone Pernossi, i konsulentëve Prof. Silvestrini e Prof. Righetti, si dhe asistenca, e mbështjellë me dashuri, e të bijëve, të cilëve u dërgojmë, me shpirt të helmuar, ngushëllimet tona”.
TIRANA TODAY
