Tirana Today publikoi para një muaji sondazhin me temë “Cili ministër duhet të largohet nga qeveria”.
Duke u bazuar te puna e këtyre ministrave, apo thjesht opinioni i përgjithshëm, qytetarët kanë votuar ministrin që sipas tyre duhet të lërë postin e tij/saj.
Por, kush është ministri më pak i pëlqyer nga ndjekësit e Tirana Today?
Arben Ahmetaj rezulton ministri më pak i pëlqyer, i cili sipas votuesve tanë, duhet të largohet nga qeveria.
Kështu, në total janë plot 1418 vota, të cilat janë shpërndarë mes ministrave. Mes këtyre votave, 335 shkojnë për largimin e ministrit të Financave dhe Ekonomisë.
Pas Ahmetajt, e dyta renditet ministrja e Arsimit, Sportit dhe Rinisë, Lindita Nikolla. Qytetarët duket se nuk janë shumë të kënaqur me punën e Nikollës lidhur me reformat arsimore. Ministrja ka marrë 222 vota për largimin e saj nga qeveria.
Në top treshen e ministrave më pak të pëlqyer nga 1418 votues, renditet edhe ministri i Brendshëm, Fatmir Xhafaj. Ky i fundit ka qenë mjaft aktiv sidomos në daljet mediatike. Por, duhet thënë se Xhafaj është po ashtu një nga ministrat më të akuzuar nga opozita si i përfshirë në aktivitete të paligjshme.
Nuk mbetet pas as ministri i Infrastrukturës dhe Energjetikës, Damian Gjiknuri, dhe as ministrja e Shëndetësisë dhe Mbrojtjes Sociale, Ogerta Manastirliu.
Gjiknuri ka marrë 164 vota, ndërsa Manastirliu 112 vota të qytetarëve që duan largimin e tyre nga qeveria.
Më pas lista vijon si më poshtë:
Mirela Kumbaro, ministre e Kulturës me 103 vota
Etilda Gjonaj, ministre e Drejtësisë me 51 vota
Senida Mesi, zëvendëskryeministre me 50 vota,
Blendi Klosi, ministër i Turizmit dhe Mjediti me 42 vota
Pandeli Majko, ministër i Shtetit për Diasporën 41 vota
Sonila Qato, ministre Shteti për Mbrojtjen e Sipërmarrjes me 32 vota.
Por, kush janë tre nga ministrat më shumë të pëlqyer në qeverinë Rama?
Ministri me më pak vota dhe më i pëlqyeri nga sondazhi i Tirana Today rezulton Ditmir Bushati. Ministri për Evropën dhe Punët e Jashtme ka marrë vetëm 10 vota. Pra, 10 nga 1418 njerëz që votuan në këtë sondazh, mendojnë se Bushati duhet të largohet nga qeveria.
Po ashtu, duket se votuesit e këtij sondazhi janë të kënaqur me punën e Olta Xhaçkës dhe Niko Peleshit. Të dy këta ministra kanë marrë nga 21 vota për sa i përket largimit nga qeveria. TIRANA TODAY
